Shefi i Kabinetit të ministrit të Jashtëm, Jetlir Zyberaj, ka thënë se sot nuk do të mbahet pelegrinazh në asnjë qytet të Kosovës, sepse për këtë organizim serbët nuk kanë marrë leje dhe pa kërkesë zyrtare nuk ka gjasa të realizohet.
Për këtë, Zyberaj shkruan se asnjë kriminel nuk do të jetë pjesë e grupit të pelegrinëve serbë sepse “vendi i tyre do të jetë në burg”, thotë ai, transmeton Gazeta Express.
“Republika e Kosovës respekton dhe garanton të drejtën e secilit qytetar për të praktikuar ritet fetare.
Megjithatë për të informuar opinionin publik, sot, nuk do të ketë kurrfarë pelegrinazhi në asnjë qytet të Kosovës, sepse një gjë e tillë nuk është kërkuar nga institucionet e Kosovës. Nuk ka asnjë kerkesë zyrtare për këtë organizm dhe rrjedhimisht nuk ka asgjë të planifikuar”, ka sqaruar Zyberaj.
Më tej thekson se institucionet e Kosovës bashkëndjejmë me shqetësimet e nënave dhe qytetarëve të Gjakovës.
“Por i garantojmë të gjithë që asnjë kriminel nuk do të jetë asnjëherë pjesë e grupit të pelegrinëvë serbë sepse vendi i tyre do të jetë në burg.
Të gjithë kriminelët serbë që kanë kryer krimet më ç’njerëzore që nga lufta e dytë botërore duhet të dalin para drejtësisë”, ka përfunduar ai.