Partia Demokratike e Kosovës ka mbajtur mbledhjen e Këshillit Drejtues të partisë.
Lideri i kësaj partie, Kadri Veseli, theksoi vlerën e procesit të brendshëm zgjedhor si një proces i hapur, transparent dhe demokratik.
Ai ka potencuar po ashtu, se PDK-ja do të ketë barrën e përgjegjësisë së madhe për t’i dhënë Kosovës dhe qytetarëve të saj besimin në shtetin dhe institucionet e Kosovës.
“Ne si forcë politike, kemi vlera, histori dhe krenari në shtetformim dhe shtet-ndërtim, andaj nuk do të ndalemi së punuari për shtetin, qytetarin dhe vlerat euro-atlantike”, tha Veseli.
Pas debatit të anëtarëve të Këshillit Drejtues, ku ishin të pranishëm 118 anëtarë, u propozuan 25 anëtarët e Kryesisë së PDK-së të cilët do t’i prijnë kësaj force politike në katërvjeçarin e ardhshëm.
Anëtarët e Kryesisë së PDK-së janë: Kadri Veseli, kryetar, Abelard Tahiri, Bajrush Xhemaili, Bedri Hamza, Betim Gjoshi, Blerta Deliu, Donjet Bislimi, Eliza Hoxha, Elmi Reçica, Enver Hoxhaj, Ganimete Musliu, Fehmi Mujota, Floretë Zejnullahu, Hajredin Kuçi, Ilir Kurtishi, Luljeta Veseli-Gutaj, Memli Krasniqi, Migjen Kelmendi, Muzafer Shala, Safete Hadërgjonaj, Sami Lushtaku, Shaqir Totaj, Uran Ismaili, Valdete Idrizi, dhe Xhavit Haliti.
Votimi pro ishte me shumicë të anëtarëve të Këshillit Drejtues, ndërsa vendet tjera vakante sipas statutit të partisë, do të plotësohen në ndërkohë duke i bërë të ditur edhe për media.
