Kryetari i PDK-së, Kadri Veseli, u është përgjigjur deklarimeve të kryetarit të Mitrovicës, Agim Bahtiri, për vëllavrasje në vend, nëse presidenti Hashim Thaçi nuk thërret zgjedhjet e reja.
“Askush nuk duhet të ketë frikë nga frikacakët. Këta njerëz nuk iu kanë gjetur vendit të vet kur është dashur, për të luftuar kundër Serbisë. Sa të ekzistojë PDK-ja në Kosovë nuk do të ketë luftë civile dhe kush mendon për luftë civile, nuk ka vend në Kosovë”, tha Veseli në televizionin publik RTK.
Ai ka folur edhe rreth zgjedhjeve të reja, pas rrëzimit të Qeverisë Kurti, duke thënë se është e pamundur që ato të mbahen brenda afateve kushtetuese në kohën kur Kosova po përballet me coronavirus.
Sipas tij, nuk është e mjaftueshme të jesh pro-evropian apo pro-amerikan në Kosovë, por nëse ‘nuk mbledhin mend do të bien edhe qeveri të tjera’, pasi që ndryshimi arrihet vetëm me vizion të qartë ‘”Kosova si shtet me integrim euroatlantik dhe një shtet i zhvilluar, me ekonominë dhe tregtinë e vet”.