Kryetari i Lëvizjes për Bashkim, Valon Murati ka komentuar vizitën e kryeministrit Albin Kurti në Tiranë dhe opsionet për bashkimin kombëtar të shqiptarëve.
Murati në “Dossier D” në RTV Dukagjini ka thënë bashkimi kombëtar nuk mund të kalojë pa konsolidimin e shtetit të Kosovës.
Ai ka thënë se megjithatë konsolidimi i shtetit të Kosovës kalon nëpërmes dialogut me Serbinë.
I pari i Lëvizjes për Bashkim ka thënë se Kosova me kushtetutë e ka të ndaluar bashkimin me Shqipërinë.
Ai ka thënë se pa shkëmbim territoresh nuk mund të ketë bashkim kombëtar.
“Çdo kush që pretendon bashkim kombëtar pa treguar se si është vetëm duke mashtruar qytetarët”.
Murati thotë se ndryshimi i Kushtetutës për t’i hapur rrugë bashkimit kombëtar është shumë i vështirë duke pasur parasysh se nevojiten edhe 2/3 e votave të serbëve në Kuvend.
Ai ka thënë se Administrata e presidentit amerikan Donald Trump, Kosovën e ka shumë lart në prioritetet e saj dhe sipas tij kjo situatë duhet të shfrytëzohet.
“Nëse nuk jemi unik mund edhe të pësojmë në këto bisedime pasi nuk kemi fuqi të kundërshtojmë diçka në tavolinë”, tha Murati./Telegrafi/