Presidenti i Kosovës, Hashim Thaçi, pas kthimit të tij nga Shtetet e Bashkuara të Amerikës, ka mbajtur një konferencë për medie, ku për më shumë se një orë ka raportuar për takimet që i ka pasur gjatë kësaj vizite në SHBA.
Thaçi u përgjigj edhe në pyetjet e shumta të gazetarëve të pranishëm në konferencë, të cilët nuk e kursyen as nga pyetjet për intervistim nga Gjykata Speciale.
Thaçi e mohoi të jetë intervistuar nga Gjykata Speciale qoftë në Prishtinë apo diku tjetër.
“As nuk jam intervistuar, as në Prishtinë e as në Prishtinë”, është shprehur Thaçi, raporton Telegrafi.
Presidenti tha se roli i tij në dialogun me Serbinë do të jetë ai që ka qenë deri më tani, duke u zotuar se do të ketë një koordinim ndër institucional.
“Roli im do të jetë ai që ka qenë si president i vendit, rol me mandat të plotë Kushtetues dhe Ligjor. Do jetë një koordinim ndër institucional dhe unitet ndër-partiak por edhe prej liderëve të Kosovës”, tha Thaçi, shtuar se do të punojnë bashkërisht me secilin i cili ka përgjegjësi, duke theksuar se nuk janë në garë me njëri tjetrin.