Instituti Kombëtar i Shëndetësisë Publike në Kosovë, edhe sot do të vazhdojë me testimin e personave të cilët janë vendosur para 14 ditësh në Qendrën e Studentëve, e cila me vendim të Qeverisë së Kosovës është shndërruar në karantinë.
Faik Hoti nga Ministria e Shëndetësisë ka bërë të ditur për Telegrafin se sot pritet të testohen diku rreth 70 persona.
Testimi i personave nga Qendra e Studentëve ka nisur të premten dhe do të vazhdojë përgjatë ditëve në vijim.
Ministria ditë më parë ka bërë të ditur se ashtu si janë vendosur në karantinë, me atë renditje edhe bëhet testimi dhe nxjerrja e tyre nga karantina e personave që rezultojnë negativ në Covid-19.
Përndryshe, në karantinën e QS janë mbi 500 persona të karantinuar.
Deri më tash në vendin tonë numri i të prekurve me Covid-19 ka shkuar në 145, ndërkaq 23 të tjerë janë shëruar kurse vetëm një person ka humbur jetën.