Ekspertët e mikrobiologjisë në Spanjë po paralajmërojnë se testet e shpejta të koronavirusit që vendi i ka blerë nga Kina nuk po zbulojnë rastet pozitive.
Pas kryerjes së testeve paraprake me këto produkte të importuara nga gjiganti aziatik, Shoqëria Spanjolle e Sëmundjeve Infektive dhe Mikrobiologjia Klinike (SEIMC) përgatiti një dokument në të cilin rekomandon mos përdorimin e tyre, shkruan Busines Insider.
“Ata nuk zbulojnë raste pozitive siç pritej”, thotë një burim i cili mori pjesë në teste.
Siç shpjegohet nga gazeta spanjolle, testet e shpejta diagnostike, të prodhuara nga firma kineze Bioeasy, kanë një “ndjeshmëri” prej 30%, shumë më poshtë se 80% e rekomanduar për vlefshmëri shkencore”.
“Me atë vlerë, nuk ka kuptim të përdorni këto teste”, tha një mikrobiolog i kontaktuar nga gazeta Madrid.
Ministria e Shëndetësisë konfirmoi ankesat.
Sipas një zëdhënësi, autoritetet zbuluan “një ndjeshmëri që nuk korrespondon me atë që është vendosur në dosjen teknike”.
Nga ana e saj, ambasada kineze në Spanjë iu përgjigj raporteve të shtypit dhe tha se firma Bioeasy nuk përfshihet në listën e ofruar nga Pekini mbi furnizuesit e klasifikuar dhe nuk ka licencën e autoriteteve mjekësore të shesin produktet e saj.
Përveç kësaj, ajo siguroi që kjo firmë nuk është përfshirë në dërgesën e donacioneve nga gjiganti aziatik dhe kompani si AliBaba.
