Organizatat, Community Development Fund Kosovë (KCDF), Fondacioni Kosovar për Shoqëri Civile (KCSF), Grupi për Studime Juridike dhe Politike (GLPS), Instituti i Kosovës për Politikat Evropiane (EPIK), Instituti GAP, Lëvizja “FOL” dhe ORCA, përmes një komunikate të përbashkët, kanë reaguar për siç thonë tendencës së Presidentit të Republikës Hashim Thaçi për të ushtruar një pushtet kundër-kushtetues në raport me procesin e bërjes së koalicionit të ri qeveritar.
“Ne, organizatat e poshtëshënuara, reagojmë fuqishëm ndaj tendencës së Presidentit të Republikës Hashim Thaçi për të ushtruar një pushtet kundër-kushtetues në raport me procesin e bërjes së koalicionit të ri qeveritar, të votuar dje në Kuvendin e Kosovës. Po ashtu, dënojmë fuqishëm arrestimin e paligjshëm dhe përdorimin jo-proporcional të forcës ndaj qytetarit i cili ushtroj të drejtën e tij të fjalës së lirë”, thuhet në komunikatë.
Organizatat thonë se po reagojnë ndaj rolit aktiv që Presidenti Thaçi ushtroi në facilitimin e koalicionit të ri qeveritar.
“Rikujtojmë fillimisht që Presidenti i Republikës është përfaqësues i unitetit të popullit, dhe aktor tërësisht neutral ndaj relacioneve partiake në Kuvendin e Kosovës. Ka një serë vendimesh të Gjykatës Kushtetuese në të cilat është saktësuar e lartësuar parimi i përfaqësimit të unitetit të popullit që duhet të ushtroj Presidenti i Republikës, dhe të cilat nënkuptojnë që ai/ajo e ka të ndaluar përfshirjen në çfarëdo marrëdhënie që ndjek një interes partiak apo qëllim pushteti jashtë kompetencave të ngushta kushtetuese. Duke u nisur nga kjo e fundit, ne reagojmë ndaj rolit aktiv që Presidenti Thaçi ushtroi në facilitimin e koalicionit të ri qeveritar, në përmasa të tilla sa që edhe një deputet i mazhorancë së re parlamentare (Haxhi Shala) e pranoj që ai ka ndryshuar qëndrimin e tij votues pro qeverisë së re si rezultat i ndikimit të presidentit Thaçi”, thuhet më tej, transmeton Telegrafi.
Sipas tyre, Presidenti nuk guxon të ushtrojë rol të tillë direkt duke lobuar forcërisht tek deputetët që të ndryshojnë qëndrimin e tyre ndaj votimit të një koalicioni qeverisës.
“Ne gjykojmë që një fakt i tillë është seriozisht i rrezikshëm për demokracinë e Republikës së Kosovës. Presidenti i Republikës nuk guxon të ushtroj rol të tillë direkt duke lobuar forcërisht tek deputetët që të ndryshojnë qëndrimin e tyre ndaj votimit të një koalicioni qeverisës. Kjo bëhet edhe më problematike kur shohim që vota e deputetit Haxhi Shala ishte përcaktuese sa i përket kalimit të qeverisë së re në Kuvend. Një ushtrim i tillë ndikimi, përmes lobimit aktiv për ndryshim të qëndrimit në raport me votën ndaj qeverisë së re, është shkelje e rëndë kushtetuese e Presidentit të Republikës”, thuhet tutje.
Në fund e kanë quajtur të papranueshëm sulmin e mbrojtjes së afërt të Presidentit ndaj qytetarit i cili thonë se po ushtronte të drejtën e tij për protestë.
“Dhe aq më tepër aprovimi dhe stimulimi i këtij veprimi nga Presidenti në një nga paraqitjet e tij televizive mbrëmë Përtej kësaj është tepër shqetësuese gjuha linquese dhe degraduese e Presidentit karshi partive politike apo individëve të caktuar në pozita institucionale. Në fund, bëjmë thirrje të gjithë spektrit politik dhe institucioneve të shtetit për respektimin e Kushtetutës së Kosovës dhe mbrojtjen e të drejtave themelore të qytetarëve të Republikës së Kosovës”, thuhet në fund.
