Krimineli i dënuar i luftës, Vojislav Sheshel, në programin e TV Happy, ka paralajmëruar presidentin e Malit të Zi, Milo Gjukanoviq.
Duke folur për zhvillimet që nga kalimi i Ligjit për liritë fetare, Sheshel akuzoi Gjukanoviqin ‘për sulm ndaj Serbisë dhe Rusisë’ dhe pastaj vazhdoi me kërcënime.
“Që nga Greqia e lashtë, ekzistonte një parim etik që vrasja e tiranit është një gjë pozitive dhe e justifikuar me moral. Kushdo që përdor forcë kundër njerëzve nuk do të ketë mëshirë ndaj tij. Unë nuk e mbroj likuidimin e tij, por e paralajmëroj atë. Nëse dikush e kishte paralajmëruar Çausheskun (presidenti i vrarë rumun) me kohë, ai mund të ishte larguar. Unë paralajmëroj Milo Gjukanoviq…”, citohet të ketë thënë krimineli serb Vojislav Sheshel.
Partia Demokratike e Socialistëve ka reaguar ndaj kërcënimeve të Sheshel, duke e quajtur atë një palaço që vazhdon me deklarime skandaloze pas daljes nga Haga. /kp