Shtetet e Bashkuara të Amerikës, kanë kërkuar sërish nga Qeveria e Kosovës që të largojë taksën 100 për qind për mallrat që vijnë nga Serbia dhe Bosnja e Hercegovina.
Në komunikatën e bërë nga ambasada e SHBA-së, në Prishtinë thuhet se është koha për Kosovën dhe fqinjët të mënjanojnë pengesat për qarkullimin e lirë të mallrave.
“Në kohëra si kjo, bashkëpunimi rajonal dhe ndërkombëtar është kyç. Është koha për Kosovën dhe fqinjët të mënjanojnë pengesat për qarkullimin e lirë të mallrave. Sërish ftojmë Qeverinë e Kosovës të ndërmarrë hapin e parë të guximshëm dhe t’i heqë tarifat që tani”, thuhet në komunikatë.
Ndryshe, kryeministri i Kosovës, Albin Kurti, kishte deklaruar se taksa 100 për qind do të largohet pjesërisht me 15 mars, mirëpo një gjë e tillë nuk ndodhi, pasi që ai nuk ka arritur ta bind Lidhjen Demokratike të Kosovës, për largimin e pjesshëm të taksës dhe zëvendësimin e saj me reciprocitet.