Rritja e mëditjeve për deputetët e Kuvendit të Kosovës ka gjasë të përfundojë në Gjykatën Kushtetuese.
Instituti Demokratik i Kosovës ka paralajmëruar se do t’i ndërmarrë të gjitha veprimet ligjore për të kundërshtuar këtë rritje, ashtu sikurse kanë bërë për pensionet suplementare, të cilën e pati shpallur kundërkushtetuese organi më i lartë kushtetues në vend, raporton KTV.
Albert Krasniqi thotë se pagat e deputetëve në Kosovë janë pesëfish më të mëdha se paga mesatare.
Derisa llogaria bankare e deputetëve pritet të mbushet me rritjen e mëditjeve, performanca e tyre për vitin që lamë pas vlerësohet të jetë më e dobëta që prej ekzistimit të Kuvendit të Kosovës.
Nga 141 ligje, sa do të duhej të miratonte Kuvendi në 2016-ën, janë miratuar vetëm 53 prej tyre, apo 36 për qind e planit vjetor.
Sipas KDI-së, Kuvendi është ballafaquar me mungesë kuorumi dhe është treguar i paaftë për të trajtuar tema të rëndësishme për vendin.