Presidenti i vendit, Hashim Thaçi, ka reaguar pas dorëheqjes së Haradinajt
Përmes një shkrimi në Facebook, Thaçi ka thënë se ndjen keqardhje për rastin e Haradinajt,e gjithashtu ka thënë se nga Specialja është ftuar edhe ish-shefi i Shtabit të UÇK-së, Bislim Zyrapi.
“Me keqardhje mësova që Gjykata Speciale ka ftuar për intervistim ish-shefin e Shtabit të UÇK-së, Bislim Zyrapi, njëherësh këshilltar i imi, ish-komandantin e Zonës Operative të Dukagjinit, kryeministrin Ramush Haradinaj, si dhe disa ish-eprorë të tjerë të UÇK-së. Nga mediat tani u informova edhe për vendimin e Kryeministrit të Republikës së Kosovës, Ramush Haradinaj, për dorëheqjen e parevokueshme nga pozita e tij”, ka shkruar Thaçi.
Presidenti ka thënë se e respekton vendimin e Haradinajt, duke theksuar se do të veprojë, sipas kushtetutës, për hapat e mëtejmë.
“Unë e respektoj vendimin e tij dhe si President i Republikës së Kosovës ju siguroj se do të veprojë bazuar në kompetencat e mia kushtetuese dhe ligjore, për të cilat qytetarët e Kosovës do të njoftohen me kohë. Unë besoj në pastërtinë e luftës së Ushtrisë Çlirimtare të Kosovës dhe besoj në vlerat e larta morale të ushtarëve të lirisë. As vlerat e lirisë sonë dhe as luftën e UÇK-së nuk mund ta cenojë askush”, ka shkruar Thaçi.