Presidenti francez Emmanuel Macron e ka përshkruar Bosnjën dhe Hercegovinën si një “bombë me sahat” dhe shqetësimi më i madh për Evropën në Ballkan për shkak të asaj që ai tha ishte “problemi i tij i kthimit të xhihadistëve”.
I pyetur në lidhje me ofertën e tij të suksesshme në tetor për të bllokuar Shqipërinë dhe Maqedoninë e Veriut nga fillimi i bisedimeve të anëtarësimit në Bashkimin Evropian, Macron tha se asnjë nga të dy vendet nuk ishte burimi kryesor i shqetësimit në Ballkan, përcjell Telegrafi.
“Nëse jeni i shqetësuar për këtë rajon, çështja e parë nuk është as Maqedonia, as Shqipëria, është Bosnje-Hercegovina. Bombë me sahat që po rreh menjëherë pranë (anëtares së BE-së) Kroacisë, dhe e cila përballet me problemin e kthimit të xhihadistëve”, ka thënë Macron, duke iu referuar luftëtarëve të arratisur ose të liruar nga grupi i armatosur i Shtetit Islamik të Irakut dhe Levant (ISIL ose ISIS) të cilët mund të kthehen në Evropë.
Dhe siç shkruan Al Jazeera, anëtari kroat i presidencës së Bosnjës, Zeljko Komisic, tha se ai do të thërriste ambasadorin e Francës në Sarajevë për një shpjegim të komenteve që Macron bëri në një intervistë me revistën The Economist, botuar të enjten.
Ndërkohë, Ministria e Jashtme franceze nuk kishte asnjë përgjigje të menjëhershme ndaj reagimit në Bosnjë.
Gjithashtu një zëdhënës për bashkësinë islamike të Bosnjës, Muhamed Jusic, i përshkroi komentet e Macron si “skandaloze” dhe tha se presidenti francez po shpifte për të justifikuar parandalimin e vendeve të Ballkanit me “popullsi të konsiderueshme myslimane” nga përmbushja e aspiratave të tyre për anëtarësim në BE.
“Rreth 300 qytetarë boshnjakë, shumica prej tyre gra dhe fëmijë, shkuan në fushat e betejave në Siri dhe Irak në krahasim me mbi 1.900 francezë”, ka thënë Jusic, duke shtuar se Franca ka dyfishin e luftëtarëve të huaj se çdo vend tjetër të Evropës Perëndimore.
“Këto ditë, Franca pret kthimin e 450 xhihadistëve… Unë nuk e shoh se si ky është një problem më i madh në Bosnje sesa në Francë”, ka shtuar ai.
