Në rrjetin social facebook, Pacolli ka shkruar se ministri i Brendshëm, Stefanoviq dhe drejtori i të ashtuquajturës zyrë për Kosovën në Serbi, Marko Gjuriq nuk kanë lejë të qëndrojnë në Kosovë.
Ai ka paralajmëruar zyrtarët serbë se nëse tentojnë të hyjnë në shtetin e Kosovës, do të arrestohen.
“Nebojsha Stefanoviq ka pasur leje por i është revokuar ndërsa Marko Gjuriq nuk ka leje deri më sot. Pra për të hyrë sot në Kosovë nuk kanë leje asnjëri prej tyre. Nëse ministrat serb futen në territorin e Kosovës ata do të arrestohen!”, ka shkruar Pacolli në facebook.
Lajmi.net qysh mbrëmë ka raportuar se zyrtarëve serbë iu është refuzuar kërkesa për të hyrë në Kosovë.
Qindra pjesëtarë të ROSU-s janë aktualisht në Mitrovicën e Veriut, nga ku po e përcjellin situatën.
Policia me anë të një komunikate ka bërë të ditur se do ta zbatojë vendimin e qeverisë, duke i ndaluar ministrat serbë në kufi.
