Nënkryetarja e Lidhjes Demokratike të Kosovës, Vjosa Osmani ka thënë se vizitat e ambasadorëve në zyrat e partive politike, nuk kanë të bëjnë me presion për arritjen e marrëveshjes për koalicion.
Sipas Osmanit, këto janë vizita të zakonshme të cilat i bëjnë përfaqësuesit e ambasadave të akredituara në Kosovë, për tu informuar drejtpërdrejt nga politikanët për idetë që kanë për të dal nga situata e krijuar politike.
“I shoh si krejtësisht normale, sepse politika e jashtme është fushë që e përcjelli. Nuk janë trysni, janë takime të zakonshme që ambasadat i bëjnë për tu informuar nga ne se cili është qëndrimi ynë, cilat janë idetë që i kemi deri tani për të dalur nga situatat e deritanishme dhe si mund të kontribuojmë tash e tutje. Normalisht marrim rekomandime të ndryshme, ndihmë e sugjerime, por në asnjë mënyrë që shtetet që e kanë ndihmuar Kosovën, jo vetëm të shpëtoj nga një regjim gjenocidal por edhe ta ndërtoj Kosovën si shtet sovran, nuk duhet të shiqohen si shtete që bëjnë trysni”, tha Osmani para medieve.
Nënkryetarja e LDK-së, foli edhe për vizitën e ambasadorit Grenell, për të cilën tha se është herët të paragjykohet se si do të rrjedh kjo vizitë dhe cilat tema do të diskutohen, por që vizita e tij tregon se Shtëpia e Bardhë është e interesuar në veçanti për Kosovën.
“Sa i përket vizitës së ambasadorit Grenell, është herët me paragjyku se cilat janë të gjitha temat, apo sygjerimet e propozimet që dop të bëhen në atë takim. Megjithatë vizita e tij tregon një interesim të madh në veçanti të Shtëpisë së Bardhë, në raport me Kosovën në veçanti dhe rajonit në përgjithësi”, u shpreh Osmani.
