Në dyvjetorin e formimit të qeverisë së udhëhequr nga Ramush Haradinaj, partitë opozitare do të tentojnë që përmes mocionit ta rrëzojnë atë dhe ta dërgojnë vendin në zgjedhje të parakohshme.
Ndonëse ka kohë që LDK, VV dhe PSD, kanë nisur mbledhjen e nënshkrimeve, fillimi i muajit shtator pritet të jetë koha kur mocioni i mosbesimit do të hidhet për votim në Kuvend, raporton KTV.
Nga LDK pranojnë se ende nuk i kanë votat e nevojshme, derisa janë të bindur se në fillim të vjeshtës do të arrijnë t’i bindin edhe disa deputetë të koalicionit qeverisës për ta mbështetur iniciativën e tyre.
Se vendi duhet të shkojë në zgjedhje, e thonë edhe paritë në pushtet.
Ndonëse thotë se nuk do ta përkrahë mocionin e opozitës, deputeti i Nismës ka një ide tjetër.
Por, nga zërat pro zgjedhjeve në shtator, nuk është e befasuar partia e kryeministrit.
Ajo është e bindur se qeveria e udhëhequr nga Haradinaj ka bërë punë të mirë dhe se, si e tillë, duhet të vazhdojë ta udhëheqë Ekzekutivin.
Ramush Haradinaj i AAK-së, është zgjedhur kryeministër i Kosovës në shtator të vitit 2017, duke udhëhequr kështu koalicionin qeverisës bashkë me PDK-në, Nismën, AKR-në e Listën Serbe si dhe disa parti tjera të minoriteteve.
