Ministria e Shëndetësisë ka njoftuar se nga dita e nesërme (15 korrik) informacionet për numrin e mostrave të analizuara, numrin e atyre që rezultojnë pozitiv në COVID-19, numrin e të shëruarve, numrin e të vdekurve, numrin e rasteve aktive, si dhe shpërndarjen e tyre sipas komunave, do të publikohen në orën 15:00.
Ministria e Shëndetësisë po ashtu bën të ditur se në ora 15:00 tash e tutje do të jepen edhe të dhënat për numrin e pacientëve të shtrirë në Shërbimin Spitalor dhe Klinik Universitar të Kosovës dhe njësitë e tij- spitalet e përgjithshme, gjendjen shëndetësore të pacientëve si dhe karakteristika të tjera me interes rreth ecurisë klinike të COVID-19, në Kosovë.
“Me qëllim të informimit në një kohë sa më të përshtatshme për publikun për rezultatet e testimeve për SARS-COV-2 nga ana e Institutit Kombëtar të Shëndetësisë Publike të Kosovës; përkatësisht për numrin e mostrave të analizuara, numrin e atyre që rezultojnë pozitiv në COVID-19, numrin e të shëruarve, numrin e të vdekurve, numrin e rasteve aktive si dhe shpërndarjen e tyre sipas komunave, duke filluar nga dita e nesërme, 15 korrik 2020, ky informacion do të ndahet me publikun çdo ditë në ora 15:00, qoftë përmes konferencave për media, lidhjeve të drejtpërdrejta apo formave të tjera të përshtatshme për publikun.
Po në këtë komunikim, çdo ditë do të jepen edhe të dhënat për numrin e pacientëve të shtrirë në Shërbimin Spitalor dhe Klinik Universitar të Kosovës dhe njësitë e tij- spitalet e përgjithshme, gjendjen shëndetësore të pacientëve si dhe karakteristika të tjera me interes rreth ecurisë klinike të COVID-19 në Kosovë”, thuhet në njoftim.
Po ashtu, Ministria e Shëndetësisë bën të ditur se sonte nuk do të ketë rezultate për rastet e reja me COVID-19, pasi që kjo do të bëhet gjatë ditës së nesërme.
“Për këtë qëllim, Ministria e Shëndetësisë do të ndaj sot me ju informatat kryesore të deritanishme në dispozicion, kurse komunikimi i rezultateve të mostrave që do të analizohen gjatë ditës së sotme do të bëhet nesër në konferencën për media, që do të organizohet për këtë qëllim”.
Ndërkaq, që nga fillimi i pandemisë e deri tani në Kosovë me coronavirus janë infektuar 5 mijë e 118 qytetarë. 2 mijë e 370 janë shëruar kurse janë regjistruar edhe 108 raste të vdekjeve.
Instituti Kombëtar i Shëndetit Publik në Kosovë ka njoftuar se aktualisht raste aktive janë 2 mijë e 640.