Ministrja e Kulturës, Rinisë dhe Sportit, Vlora Dumoshi, priti sot, në një takim njohës, ambasadorin e Gjermanisë në Kosovë, Christian Heldt, me të cilin bisedoi për bashkëpunimin ndërmjet Ministrisë dhe Ambasadës së Gjermanisë në vendin tonë.
Ambasadori gjerman Heldt fillimisht i shprehu urimet më të përzemërta ministres Dumoshi për marrjen e detyrës së re. Ai foli për kulturën dhe rininë si dy fusha mjaft të rëndësishme për vendin tonë duke mos harruar edhe fushën e sportit, e cila ka një status dhe rëndësi të veçantë.
Ambasadori Heldt, me këtë rast, ka vënë theksin te rinia duke thënë se ambasada gjermane do të mbështesë rininë e Kosovës përmes projekteve të ndryshme.
Ministrja Dumoshi dhe ambasadori Heldt vlerësuan bashkëpunimin e ngushtë të dy shteteve. Ajo e falënderoi atë për ndihmën e vazhdueshme dhe të pakursyer që ka dhënë ambasada gjermane për Kosovën. Po ashtu, ministrja Dumoshi e njoftoi ambasadorin Heldt për politikat dhe planet e MKRS-së për zhvillimin e kulturës në vend dhe promovimin e diversitetit kulturor.
Ministrja Dumoshi e ambasadori Heldt u pajtuan për thellim të bashkëpunimit dhe angazhimit në realizimin e projekteve konkrete në kulturë, trashëgimi, e veçanërisht në avancimin dhe integrimin e rinisë në jetën institucionale e shtetërore të Kosovës.