Ministri i Infrastrukturës, Pal Lekaj, ka konfirmuar në Puls të KTV-së se ministria që ai udhëheq do ta gjobisë me 12 milionë euro “Bechtel & Enka”.
Kjo, sipas tij bëhet për vonesat e mëhershme në kryerjen e punëve në autostradën “Arbën Xhaferi”.
“Jemi në përfundim të projektit dhe ne do të ndalim rreth 11 apo 12 milionë euro. Kaq do të ndalen”, ka thënë ai.
Lekaj pranon se “Bechtel&Enka” s’ka vendosur ende panelet kundër zhurmës në “Arbën Xhaferi”
Shifra megjithatë është shumë herë më e ulët se ajo që Kosova pagoi për vonesat në drejtim të “Bechtel&Enkas”. Ajo shifër arrin në 53 milionë euro.
Ai ka konfirmuar se më shumë se 80 për qind 53 milionë eurove tashmë janë paguar.
Lekaj po ashtu ka pranuar se ka dështime në zgjerimin e rrugës nacionale Prishtinë – Podujevë duke thënë se është dashur revidim i projektit. Ai ka shtuar se Policia e Krimeve Ekonomike ka kërkuar dokumentet e autostradës Prishtinë – Gjilan.