Zëvendësdrejtori i deritashëm i Agjencisë Kosovare të Inteligjencës, Latif Merovci, do të jetë përkohësisht në krye të këtij agjencioni pas dorëheqjes së Agron Selimajt.
“Zëvendësdrejtori i AKI-së përkohësisht kryen dhe ushtron përgjegjësitë e drejtorit të AKI-së gjatë mungesës apo paaftësisë të drejtorit. Në rast të paaftësisë të përhershme, zëvendësdrejtori i AKI-së kryen dhe ushtron përgjegjësitë e drejtorit të AKI-së deri në kohën kur zëvendësimi i Drejtorit të KIA-s emërohet në mënyrë formale”, thotë pika e 6-të e nenit të 6 të të Ligjit për AKI-në, që përcakton kompetencat e zëvendësdrejtorit.
Latif Merovci është emëruar Zëvendësdrejtor i Agjencisë së Kosovës për Inteligjencë në Shkurt 2015, nga Presidenti dhe Kryeministri i Republikës së Kosovës. Në të njëjtën kohë kur në pozitë kishte ardhur edhe Agron Selimaj si shef i AKI’së.
Merovci ka ndjekur studimet e doktoratës në Universitetin e Prishtinës, Fakultetin Ekonomik, në fushën e Menaxhmentit dhe Informatikës. Ka përfunduar studimet Master në fushën e Menaxhmentit dhe Informatikës, ndërsa fakultetin në fushën e Bankave dhe Financave në të njëjtin Universitet.
I specializuar në fushën e Inteligjencës, Luftimin e Terrorizmit, Luftimin e Pastrimit të Parave, Hetimeve, Hetimeve Financiare, etj.
Nga viti 2013 deri më 2015 ka qenë i angazhuar si Asistent në Fakultetin Ekonomik në Universitetin e Prishtinës.
Nga viti 2009 deri 2013 ka qenë i emëruar në pozitën e Zëvendësdrejtorit të Agjencisë së Kosovës për Inteligjencë.
Merovci prej viti 2000 deri 2009 ka punuar në Policinë e Kosovës në pozita të ndryshme drejtuese. Pesë vitet e fundit ka qenë Drejtor për Hetimin e Krimeve të Rënda dhe ka mbajtur gradën e Nënkolonelit.