Kryeministri në detyrë i Republikës së Kosovës, Albin Kurti, i është drejtuar sot me një letër presidentit të Kosovës, Hashim Thaçi.
Në letrën e Kurtit thuhet se presidenti Thaçi nuk ka të drejtë e as autorizim kushtetues të konstatojë se LVV ka refuzuar të propozojë kandidatin për kryeministër.
“Bazuar në rolin dhe funksionin si President, ju nuk keni të drejtë e as autorizim kushtetues për të konstatuar se kemi refuzuar propozimin e kandidatit për kryeministër kur nuk e kemi bërë këtë; ju nuk e keni në mandat e kompetencë që të përcaktoni përtej Kushtetutës se si e çfarë do të jetë Qeveria, siç keni bërë këtyre ditëve në deklarimet publike; dhe, me keqardhje konstatojmë se ende nuk na jeni përgjigjur se në bazë të cilës pikë të nenit 95 po veproni dhe po na drejtoheni”, thuhet në letrën e Kurtit drejtuar Thaçit.
