630 uzurpatorë të pronave shoqërore në vitin 2014 janë larguar me përkrahje të ish-kryetari të Kuvendit, Kadri Veseli dhe ish-kryeministrit, Isa Mustafa. Prej 1250 kontratave të shitjes rreth 25 për qind kanë qenë të uzurpuara në atë kohë. E disa prej tyre janë shitur me gjithë uzurpator.
Kështu ka deklaruar zëvendës Drejtori Menaxhues në Agjencinë Kosovare për Privatizim, Avni Jashari në raportimin e sotëm të tij para Komisionit Hetimor Parlamentar lidhur me procesin e privatizimit në Kosovë.
“Deri në fund të vitit 2014 prej diku 1250 kontrata të shitjes rreth 25 për qind kanë qenë të uzurpuara. Pra 25 për qind e tyre kanë qenë me uzurpator, në shumën monetare në atë kohë ka qenë 106 milionë vlera e pronave të shiturave me uzurpator. E në aspekt të përgjithshëm ka qenë diku rreth 600 milionë. Aspekti i dytë ka qenë numri i madh i aseteve të pashitura që kanë mbetur të uzurpuara. Në periudhën kur unë e kam nxjerr vendimin kanë qenë 630 uzurpator të pronave shoqërore të ndryshme. Po flas për vitin 2014”, tha ai.
E deputeti i PDK-së në këtë komision, Gazmend Bytyçi kërkoi nga Jashari se në sa prej këtyre uzurpimeve ka pasur eksponentë politikë.
“Dukuria e uzurpimit të pronave publike ka qenë deri vonë dhe është përfolur prej qytetarëve. A keni informacion se sa për qind të pronave që janë menaxhuar prej AKM-së, e mandej të AKP-së kanë qenë prona të uzurpuara. Nëse keni ndonjë informacion nga eksponent të ndryshme politikë nëse kanë qenë prapa tyre dhe si ka filluar mënyra e lirimit të tyre”, tha ai.
Por Jashari, tha se nuk e di një gjë të tillë, por në lirimin e tyre ka pasur përkrahje nga bordi dhe ish kryetari i Kuvendit në atë kohë, Kadri Veseli dhe ish kryeministri Isa Mustafa.
“Në aspektin e lirimit të këtyre pronave përkrahjen e kemi pasur dhe ka qenë kërkesë edhe kryetarit të Kuvendit në atë kohë, Kadri Veseli që me i lirua gjithë ato prona. Ka qenë përkrahje edhe prej ish kryeministrit Isa Mustafa. Edhe publikimi i emrave të uzurpatorëve ka ndodhur me kërkesën e ish-kryetarit të kuvendit dhe dakordimin e plotë me anëtarët e bordit në atë kohë”, tha ai.
Ndërsa, kryetari i komisionit hetimor, Hajrulla Çeku kërkoi të di se a ka pasur ndonjë rast kur ndonjë uzurpator të jetë edhe ofertues.
“Në dijeninë tuaj nuk ka ndodhur asnjëherë që një uzurpator të jetë edhe ofertues për të blerë pronën që e ka uzurpuar”, tha ai.
Por Jashari tha se ata që kanë qenë uzurpator janë diskualifikuar në proces të shitjes.