Ushtruesi i detyrës së kryetarit të Partisë Demokratike të Kosovës, Enver Hoxhaj ka thënë se Uran Ismaili do të jetë kandidat i PDK-së për kryetar të Prishtinës.
Ai ka deklaruar kështu në Klan Kosova derisa 3 ditë më parë, Hoxhaj kishte thënë se Ismaili është i duhuri për kandidat të Prishtinës.
Javë më parë, gatishmërinë dhe dëshirën për të kandiduar për të parin e Prishtinës e kishte shprehur edhe vet Sekretari i Përgjithshëm i PDK-së, Uran Ismaili.
Ismaili kishte deklaruar se e ka shfaqur gatishmërinë e tij në organet e partisë por pret zyrtarizimin dhe përkrahjen nga partia dhe dega në Prishtinë.
Ndërkohë, Hoxhaj para 3 ditësh kishte thënë se nuk kanë biseduar lidhur me këtë çështje por kishte shprehur hapur përkrahjen e tij për Ismailin.
“Nuk kemi arritur deri tash ta bisedojmë këtë teme. Ismaili e ka mbështetjen time, por duhet ta bisedojmë me degën, por i ka të gjitha përgatitjet për të qenë kryetar i Prishtinës”, ka deklaruar Hoxhaj.
Ndërsa sonte, ai ka potencuar se Ismaili do të jetë kandidati i PDK-së për Prishtinën në zgjedhjet lokale të fundvitit të ardhshëm.