Ushtruesi i detyrës së kryetarit të PDK-së, Enver Hoxhaj ka folur për deklaratat e ministres së Jashtme dhe Diasporës, Donika Gërvalla lidhur me UÇK-në.
Hoxhaj tha se deklaratat e ministres Gërvalla janë të paprecedentë, dhe se kur flet ministrja e jashtme flet Qeveria.
“Ajo çfarë po bënë zonja Gërvalla, e cila në emër të Qeverisë së Kosovës po e godet luftën tonë të drejtë dhe të shenjtë, luftën e UCK është e paprecedente. Kur fol ministri i jashtëm, fol Qeveria”, tha Hoxhaj.
U.d i kryetarit të PDK-së, tutje shtoi se Gërvalla po flet sikur të ishte ministre e Serbisë ose Rusisë.
“Nëse ky është qëndrimi i Qeverisë në raport me të kaluarën tonë historike, me luftën tonë të lavdishme dhe mënyrën sesi zonja Gërvalla çdo ditë po e godet UCK dhe po flet sikur të ishte ministre e jashtme e një shteti kundërshtar të Kosovës, të Serbisë apo Rusisë, është temë serioze e ka shkel çdo kufi të mundshëm të komunikimit partiak dhe ne presim nga z.Kurti dhe Qeveria e tij që të distancohet. Nëse Kurti ka pikëpamje tjetër do të duhej të distancohet”, u shpreh Hoxhaj.
Hoxhaj theksoi se asnjëherë nuk ka pasur qeveri në Kosovë, e cila ka qenë më shumë anti UÇK sesa qeveria aktuale në bazë të deklaratave që i thotë zonja Gërvalla.
“Është temë serioze që e dëmton të ardhmen e Kosovës dhe identitetin tonë si popull dhe si komb”, tha ai.