Kandidati për kryetar të Lidhjes Demokratike të Kosovës, Lutfi Haziri ka folur sot edhe për largimin e Vjosa Osmani nga kjo parti. Ai tha se beson që ka ardhur koha që Osmani të kthehet në LDK dhe ta jap kontributin e saj.
Haziri në konferencën ku zyrtarizoi kandidaturën e tij për kryetar të LDK-së tha se në fakt Osmanin asnjëherë nuk e ka parë jashtë kësaj partie.
“…Kurrë se kom pa jashtë LDK-së, ka qenë vullnet i saj. Nuk ka mundur askush me preventu politikisht. LDK rënien nuk e ka në dekadë, ka ndodh prej 6 tetorit deri më 14 shkurt… krejt kjo periudhë është… duhet me pa këtë periudhë kohore ku ka ndodh gabimi… Humbje besimit dhe largim nga LDK-ja për arsye të caktuar. Besoj se ka ardhur koha mu pajtu dhe mu khty në LDK për ta dhënë kontributin e vet”, tha Haziri.
Ai ka folur edhe lidhur me përkrahjen publike të kryetarit të Vushtrrisë, Xhafer Tahiri për kandidatin tjetër për kryetar të LDK-së, Lumir Abdixhiku.
“Është pjesë e mendimit të tij. Po ajo që thuhet në LDK është se me kë bëhet Xhafa ai humb”, u shpreh Haziri, raporton Telegrafi.
Ai tha se nuk e pranon tifozllëkun, pasi sipas tij, kjo nuk është garë sportive.
“Nuk e pranoj tifozllëkun sepse nuk jemi garë sportive. Aktivitet normal i brendshëm, njihemi mes vete dhe lirshëm mund të votohet”, tha ai.
