Nënkryetari i Lidhjes Demokratike të Kosovës, Lutfi Haziri, i ka quajtur si jo reale sondazhet që e nxjerrin Lëvizjen Vetëvendosje si subjekt, i cili i merr 52% të votave në Kosovë.
Ai ka theksuar se nuk e lejon sistemi proporcional zgjedhor një rritje të tillë.
“Nëse në pandemi vlerësimet politike dalin të sakta, unë e përqafoj çdo rezultat që dikush e arrinë… Jam njëri prej politikanëve që e ka përjetuar pesë herë fitoren me 60 për qind. 62 për qind i kam fituar në zgjedhjet për kryetar të komunës. Si deputet në listën e LDK-së, jam në pesëshen e parë gjithmonë, por asnjëherë nuk më ka impresionuar kjo punë – përkundrazi më ka bërë më të përgjegjshëm dhe më kokulur”, ka thënë Haziri, në emisionin Rubikon në Klan Kosova.
“Këto nuk janë sondazhe të drejta sepse në pandemi, preokupimi i parë i qytetarëve është mbijetesa. Mund të ketë perceptimin publik që e përqafojnë shume njerëz nga pakënaqësitë e ndryshme politike, por duhet të dëshmohet në të ardhmen e afërt që kjo mund të dalë e vërtetë, sepse sistemi ynë proporcional zgjedhor nuk e lejon asnjë parti politike që t’i fitojë më shumë se 43 apo 44 për qind”.
“Edhe koalicionet nuk lejojnë sepse partitë e vogla dhe partitë e minoriteteve e gërryejnë pjesëmarrjen në kurriz të partive të mëdha. 52 për qindshi nuk qëndron. Edhe 35 përqind është shumë, atë që Albin Kurti e ka quajtur rritje të frikshme”, tha Haziri.