Kryetari i Aleancës për Ardhmërinë e Kosovës, Ramush Haradinaj ka thënë sot se gastronomia është një nga sektorët që po i bartë pasojat më të rënda të izolimit, duke kërkuar hapjen e menjëhershme të ekonomisë.
Haradinaj në një postim në rrjetin social Facebook shkruan se ndihma e njëhershme prej 170 eurosh për një të punësuar, është e pamjaftueshme dhe nëse shteti nuk i ndihmon bizneset e vogla e të mesme të rikuperohen, rënia ekonomike mund të jetë fatale, ndërsa papunësia në vend do të dyfishohet.
Lexoni të plotë postimin e Haradinajt:
“Gastronomia, një nga sektorët që po i bartë pasojat më të rënda të izolimit, duhet të gëzojë̈ mbështetje urgjente financiare për rimëkëmbje. Vizitova sot gjellëtoren “Te Nazi”, biznes familjar, që ka rreth 100 të punësuar.
Me pronarin Fahri Rexhepi bashkëbiseduam rreth pakos emergjente fiskale nga Qeveria në detyrë, e cila u pajtuam se është e vonuar dhe nuk i plotëson assesi parametrat për rimëkëmbje ekonomike, duke rrezikuar shuarjen e shumë bizneseve.
Ndihma e njëhershme prej 170 eurosh për një të punësuar, është e pamjaftueshme. Nëse shteti nuk i ndihmon bizneset e vogla e të mesme të rikuperohen, rënia ekonomike mund të jetë fatale, ndërsa papunësia në vend do të dyfishohet.
Shumica e veprimeve kane qenë panik, e jo analizë e kujdesshme dhe shumë prej këtyre masave kane shkaktuar pasoja të panevojshme ekonomike.
Prandaj kërkohet heqja e menjëhershme e masave panikuese dhe hapja e ekonomisë. Çdo ditë e humbur është e pakompensueshme”.
