Kryetari i AAK-së, Ramush Haradinaj ka reaguar pas shkarkimit të bordit të ShSKUK-së nga Qeveria në detyrë.
Haradinaj, pwrmes njw postimi nw Facebook, ka thënë se epidemia po politizohet nga qeveria aktuale mbi supet e shëndet të popullit.
Ai ka përmendur se në bord është bërë një emërim politik, pasi u vendos për këshilltarin politik të ministrit dhe kandidatin për deputet, Mirsad Shkretën.
Postimi i plotë i Haradinajt:
“Kryeministri i shkarkuar vazhdon me shkarkime.
Qeveria në ikje sot në kohë epidemie gjatë kohës kur qanë e çirret se të tjerët po sulmojnë padrejtësisht, merr vendimin më të rrezikshëm menaxhues duke vënë në rrezik tërë popullin. Sot kjo Qeveri e mashtrimit shkarkon bordin kinse politik të ShSKUK-së për ta zëvendësuar me këshilltarin POLITIK të Ministrit, kandidatin për deputet të Vetëvendosjes, Mirsad Shkretën.
Epidemia po politizohet nga kjo Qeveri mbi supet e shëndetit të popullit. Kryeministri i shkarkuar me mbi 2/3 të Kuvendit, vazhdon me shkarkime. Ja fytyra e vërtetë e kësaj Qeverie, e cila parim të vetëm ka mashtrimin. Kjo është shkapje për kapje!”, ka shkruar Haradinaj.
Qeveria në detyrë e Republikës së Kosovës në mbledhjen e mbajtur të premten ka shkarkuar Bordin Drejtues të Shërbimit Klinik Universitar të Kosovës dhe ka emëruar Bordin e ri, të cilin do ta drejtojë Xhevat Jakupi.
Në njoftimin e lëshuar nga mbledhja e Qeverisë në detyrë thuhet se ka aprovuar vendimin për shkarkimin e Bordit Drejtues të Shërbimit Klinik Universitar të Kosovës për arsye se nuk i ka përmbushur detyrat dhe përgjegjësitë e rëndësishme të përcaktuara me Statutin e SHSKUK-së dhe ka dështuar në arritjen e objektivave.
