Komuna e Suharekës në bashkëpunim me Karitasin ka mundësuar ofrimin e shërbimeve mjekësore për ata persona të kësaj komune që e kanë të pamundur mjekimin jashtë shtëpisë. Një ekip e mjekëve e cila operon gjatë tërë javës, ofron këto shërbime në të gjitha fshatrat e Suharekës. Ndërsa kryetari i kësaj komune, Bali Muharremaj ka thënë se do të rrisë numrin e ekipeve në teren.
Ekipa e mjekëve e cila ofron shërbime mjekësore nëpër shtëpi të pacientëve që nuk mund të vizitojnë ambulantat, u shoqërua nga i pari i Suharekës, Bali Muharremaj.
Doktor Rrustem Musaj, i cili ka 3 vite që e bën këtë punë në teren, thotë se i kryejnë të gjitha shërbimet e njëjta sikurse nëpër qendrat e mjekësisë.
“Të gjitha shërbimet që kryhen në një ambulantë mjekësore i kryejmë edhe ne. I kryejmë vizitat mjekësore nëse pacienti ka nevojë për një vizitë, pastaj aplikojmë terapitë ku përfshihen infuzionet apo injeksionet”, deklaroi për RTV Dukagjinin, mjeku Rrustem Musaj.
Një ndër vizitat e radhës të kësaj ekipe ishte edhe tek kjo plakë e vetmuar në fshatin Studençan të kësaj komune.
Gani Bytyqi, i cili është një nga pacientët, është shprehur mjaft i lumtur me shërbimet që i ofrohen në shtëpi.
“Shpërblim më të madh se që e kanë bërë këto motrat unë nuk di”, deklaroi Gani Bytyqi, përcjell Telegrafi.
Ndërsa kryetari i Komunës së Suharekës, Bali Muharremaj, ka thënë se duke parë nevojën e pacientëve, do të rrisë numrin e ekipeve mjekësore në teren.
“Në vit bëhen rreth tre mijë kontrolle. Planifikojmë të bëjmë dy ekipa që të përfshijmë të gjithë territorin e Komunës së Suharekës”, deklaroi Bali Muharremaj.
Ky projekt i Komunës së Suharekës është bërë në bashkëpunim me Karitasin, teksa numri i pacientëve që u ofrohen këto shërbime arrin në 200./RTV Dukagjini/