Muri i ndërtuar në Mitrovicë “nën dirigjimet nga Serbia”, do të rrënohet gjatë muajit janar, ka thënë për Radion Evropa e Lirë, ministrja për Dialog në Qeverinë e Kosovës, Edita Tahiri.
Sipas saj, vendimi për rrënimin e tij bazohet në ligjet e Kosovës të cilat nuk lejojnë kufizimin e lirisë së lëvizjes.
Muri në Mitrovicë është ndërtuar në afërsi të urës kryesore mbi lumin Ibër, ku Bashkimi Evropian po zbaton një projekt për rivitalizimin e urës dhe vënien e saj për qarkullim të rregullt pas barrikadave që ishin vendosur aty e të cilat pengonin lirinë e lëvizjes nga jugu në veri të Mitrovicës dhe anasjelltas.
Kjo urë, ishte paralajmëruar se do të kthehet në qarkullim për makina dhe këmbësor qysh nga 20 janari i këtij viti.
Por, tani mbetet të shihet se si do të veprohet me murin e ngritur aty nga autoritetet lokale të Mitrovicës së veriut, që udhëhiqet nga përfaqësuesit serbë.
“Ndërtimi i këtij muri kishte prapavijë politike në mënyrë që të pengohet procesi i rivitalizimit të urës. Kjo është e qartë. Për më shumë se kaq, Serbia me të ka provuar destabilizimin e situatës në Kosovë, por ne kemi qenë shumë vigjilent ndaj këtyre provokimeve”, ka thënë Tahiri.
Sipas saj, ashtu siç janë hequr barrikadat në veri, do të largohet edhe ky mur i ndërtuar ilegalisht.
Muri në pjesën veriore të qytetit të Mitrovicës ka filluar të ndërtohet në fillim të dhjetorit të vitit 2016, duke ngjallur reagimin e qytetarëve dhe të politikës.
Kuvendi i Kosovës, ka miratuar një Rezolutë për çështjen e këtij muri, duke i kërkuar qeverisë që ta rrënoj atë brenda muajit janar të vitit 2017.