Bashkëluftëtarët, Sadri Ajvazi dhe Hashim Feka arritën të njihen së fundmi përmes emisionit “Prite të Gjelbrën” të RTV 21.
Sadri Ajvazi nga Zhegra e Gjilanit më 07 maj në emision rrëfeu një ngjarje nga lufta e fundit në Kosovë dhe kërkoi që t’i mundësohet takimi me shpëtimtarin e tij, të cilin nuk e njohu deri më sot.
Ai tutje rrëfeu se shpëtimtari në atë moment ishte plagosur në faqe nga ushtria serbe. Gjilanasi tha më 07 maj krejt çka dinte për të ishte se ai ushtar shpëtimtar ishte nga Drenica dhe pas plagosjes ai ishte dërguar në Gjermani për shërim. Ndërkohë, atë ditë që telefonoi Sadri Ajvazi në “Prite të Gjelbrën”, autorin e e emisionit, Robert Bojajn e telefonoi motra e personit që ia ka shpëtuar jetën Ajvazit.
Pra, u kuptua që personi që ia kishte shpëtuar jetën luftëtarit nga Gjilani është Hashim Feka, i cili jeton në Itali, shkruan rtv21.tv Dhe, sot, live në emision të inkuadruar ishin dy bashkëluftëtarët, të cilët u panë prapë pas 21 vjetëve. Hashim Feka rrëfeu momentet kur gjatë betejës së “Koshares” ka shpëtuar Sadri Ajvazin. Ndërsa, Sadri Ajvazi për njeriun që ia ka shpëtuar jetë, Hashim Fekën tha që e ka vëlla dhe shoqërinë do ta kenë deri në vdekje.
