Ndonëse data e zgjedhjeve nuk është shpallur ende, aderimet tashmë kanë filluar të ndodhin në subjekte politike. Njohësit e çështjeve politike thënë se aderimet janë strategji për të fituar elektorat.
Zakonisht para zgjedhjeve janë bërë të paevitueshme aderimet e ndryshme në parti politike. Kalimet nga bota e artit në parti, nga mediat në parti apo edhe shoqëria civile në parti ishin trend në zgjedhjet e kaluara.
Bekim Kabashi thotë se aderimet tashmë janë bërë të zakonshme dhe subjektet e përdorin këtë për të fituar më shumë vota.
“Aderimet para zgjedhjeve janë bërë të zakonshme. Çdo herë para zgjedhjeve pritet të ketë aderime. Me afrimin e zgjedhjeve pritet të ketë më shumë aderime, pasi kjo është një strategji e partive politike sikur ato kanë një ofertë të gjerë dhe që tërheqin njerëz që bartin një personalitet të rëndësishme”, deklaroi për RTV Dukagjinin, Bekim Kabashi.
Ndërsa ligjëruesi në Katedrën e Gazetarisë, Faton Ismajli tha se aderimet që kanë ndodhur edhe parë, janë persona që kanë mbrojtur publikisht qëndrimet e partive ku aderojnë.
“Pjesa më e madhe e aderimeve që kanë ndodhur dhe po ndodhin edhe tash, janë aderime që kanë mbrojtur publikisht qëndrimet e partisë. Tani ata persona vetëm se po zyrtarizohen dhe po hyjnë në strukturat partiake”, deklaroi Faton Ismajli.
Faza e aderimeve besohet se ka nisur me kalimin e ish-këshilltarit të Isa Mustafës, Faton Abdullahu në PDK./Telegrafi/
