Një ngjarje e rëndë ka ndodhur këtë të shtunë në Prizren.
Gjatë fluturimit me paragllajd një person ka mbetur i vdekur, ndërsa një tjetër ka pësuar lëndime të rënda.
Këtë e ka bërë të ditur për Telegrafin, zëdhënësi i Policisë Rajonale të Prizrenit, Shaban Osmanollaj.
“Rreth orës 13:00, policia ka marrë një njoftim rreth një incidenti të ndodhur në një zonë të fluturimeve me paragllajd. Në parashutë kanë qenë dy persona, meshkuj. Nga informatat e para, njëri ka ndërruar jetë, ndërsa tjetri ka pësuar lëndime të rënda dhe është duke u trajtuar në Spitalin Rajonal në Prizren”, ka thënë Osmanollaj.
Mësohet se personi që mbeti i vdekur si pasojë e këtij aksidenti tragjik është Artan Venhari, 45-vjeçar.
Për vdekjen e Artanit, kanë reaguar, Zyra Kombëtare e Auditimit, ku ka punuar Artani, ish-deputeti Ilir Deda dhe ish-ambasadori i Kosovës në Suedi dhe drejtori ekzekutiv i Institutit KIPRED, Lulzim Peci.
“Me trishtim të madh mësuam lajmin për humbjen e hershme të ish kolegut tonë të nderuar Artan Venhari. Artani ka dhënë një kontribut të jashtëzakonshëm duke shërbyer si Zëvendës Auditor i Përgjithshëm i Republikës së Kosovës në një periudhë të rëndësishme për institucionin. Familjes dhe miqve ngushëllimet më të sinqerta nga Auditori i Përgjithshëm dhe ish kolegët e Artanit në Zyrën Kombëtare të Auditimit”,thuhet në reagiminin e e Zyrës së Auditimit.
“Shumë herët na la Artan! Pushove pikërisht në lirinë e qetësinë që e kishe gjet në ajër. Prehu në paqe mik i dashtun”, ka shkruar Deda.
Peci ka ngushëlluar familjen Venhari, duke thënë se Artani ka qenë njeri i dashur dhe koleg i shkëlqyer.
