Njëri nga anëtarët e partisë Nisma Socialdemokrate, që udhëhiqet nga Fatmir Limaj, është punësuar në Ministrinë që udhëhiqet nga e njëjta parti, në Ministrinë e Tregtisë dhe Industrisë.
Në një njoftim për kandidatin e suksesshëm që mban datën 25 qershor 2019 e që e posedon KALLXO.com, thuhet se Milazim Xani ka marrë 71.75 pikë për pozitën zyrtar i lartë për mallra bujqësore dhe industriale në Ministrinë e Trgtisë dhe Industrisë.
Xani ishte i akuzuar për keqpërdorim të pozitës zyrtare sa ishte inspektor fitosanitar në Agjencinë e Ushqimit dhe Veterinarisë, por ai është shpallur i pafajshëm në vitin 2015.
Në një bisedë për KALLXO.com, vetë Xani e ka pranuar se ka qenë i akuzuar ndërsa ka mohuar se partia e tij Nisma, ka ndikuar që të punësohet në MTI.
“Ende nuk jam punësuar, m`u ka konfirmuar po s’kam me fillu edhe nja një muaj ditë derisa të shihet a ka ankesa prej kolegeve të tjerë. Kam qenë i akuzuar dhe kam dal i pastër prej Gjykatës. Këshilli i Pavarur më ka kthyer në punë, por për disa arsye të tjera familjare nuk jam kthyer më, kam pas biznes privat deri në vitin e kaluar, sivjet vendosa të kthehem prapë në punë”, ka thënë Xani.
Tutje, Xani e ka pranuar se është pjesë e partisë së Fatmir Limajt, madje ai tha se nuk do ta ndalë aktivitetin partiak.
“Anëtar i Nisma-s jam dhe jam njëri ndër themeluesit e degës në Fushë Kosovë, jam i përkushtuar në parti në maksimum. E kam ndihmuar partinë në çdo drejtim dhe kurrë aktivitetin në Nisma nuk e ndali. Edhe nuk është me rëndësi a punësohem apo nuk punësohem se nuk jam hy në Nismë për me u punësu, se kur jam hy aty unë kam qenë t`u punu, aty jam hy për ideal dhe do të jem deri në fund”, tha tutje ai.
Ai kishte qenë edhe kandidat për deputet nga radhët e Nismës në vitin 2014.
Anëtari i Nismës Socialdemokrate ka thënë se është profesional për punën për të cilën është pranuar në MTI.
“Kçyre bre zotni çka po të them, në Kosovë profesionalist më të mirë se unë nuk ki, kur duash takohemi ulemi në tavolinë, edhe e kam plotësuar tekstin 100 përqind me shkrim, veç me gojë nuk më kanë vlerësuar si duhet, se mujnë me marrë dikënd tjetër. Sa i përket profesionalizmit, asnjë person inxhinier i bujqësisë nuk mund të shtyhet me mua”, ka deklaruar Xani për KALLXO.com.
“18 trajnime i kam të kryera në shtetet e Evropës dhe të Amerikës”, tha në fund ai.
Millazim Xani ishte arrestuar në vitin 2011 nën dyshimin se keqpërdori pozitën zyrtare sa ishte pjesë e Agjencisë së Ushqimit dhe Veterinarisë.
