Kryeministri Ramush Haradinaj ka akuzuar ish-ministrin Lutfi Zharku për krijimin e borxhit të 53-milionëshit ndaj “Bechtel”-it. Por, kryeministri duke reaguar ndaj Zharkut, goditi edhe ministrin e Financave, Bedri Hamza.
Kryeministri në foltoren e Kuvendit i tha ish-ministrit të Transportit Lutfi Zharku, se paret e shtetit i dhimbsen më shumë vetë atij sesa ministrave të PDK-së.
“E di që i ke pas kolegë, por a mendon që ministrave të PDK-së ju dhimbsen paret e shtetit më shumë se mua?”, i tha kryeministri Lutfi Zharkut.
Pas një fjalimi të gjatë të ish-ministrit të Infrastrukturës, Lutfi Zharku, kryeministri Ramush Haradinaj i quajti shpjegimet e Zharkut si manipulime, duke arsyetuar pagesën e gjobës prej 53 milionë eurove ndaj “Bechtel Enka”-s për autostradën Prishtinë – Hani i Elezit.
