Kryetari Lëvizjes për Bashkim, Valon Murati ka thënë se sot janë bërë 10 vite nga kur u miratua kushtetuta, e cila është kopje e parimeve të Pakos së Ahtisarit, shkruan Indeksonline.
Murati ka thënë se duhet të jemi të vetëdijshëm se shumica e problemeve të Kosovës janë kushtetuese, ndërkaq sipas tij privilegjet kushtetuese për serbët janë themeli i jofunksionalitetit të Kosovës.
Ky është postimi i plotë:
Sot po bëhen 10 vjet prej kur u miratua Kushtetuta e Kosovës, e cila është kopje e parimeve të Pakos së Ahtisaarit. Anash lavdërimeve dhe krenarisë për kushtetutën, ne si shoqëri duhet të jemi të vetëdijshëm se shumica e problemeve që sot ka Kosova në funksionimin e saj janë kushtetuese. Mbi të gjitha privilegjet kushtetuese dhe juridike për pakicën serbe, të cilat kanë natyrë bllokuese dhe shantazhuese janë themeli i jofunksionalitetit të shtetit të Kosovës. Procesi politik dhe juridik, i cili duhet të pranojmë që nuk është fare i lehtë, që do të çonte drejt ndryshimit të kësaj kushtetute është themeli i vendosjes së plotë të sovranitetit të shtetit të Kosovës.
