Kryeministri i Kosovës njëherësh lideri i LDK-së, Isa Mustafa, sot gjatë ditës do ta mbledhë Këshillin e Përgjithshëm të Lidhjes Demokratike të Kosovës. Në pikat e rendit të ditës do të diskutohet lidhur me qëndrimet politike të LDK-së në procesin e liberalizimit të vizave dhe demarkacionit me Malin e Zi.
Në ftesën të cilën e ka siguruar Gazeta Express, e që e njëjta u është dorëzuar anëtarëve të këshillit të LDK-së, kryeministri Mustafa me anëtarët e LDK-së do të diskutojë edhe për çështjen e zgjedhjeve lokale në Kosovë.
Ndryshe, kryeministri i Republikës, njëherësh kryetari i LDK-së, Isa Mustafa, para pak ditësh ka thënë se këtë muaj pritet të procedohet në Kuvend Marrëveshje e vijës kufitare me Malin e Zi.
Vlen të theksohet se LDK-ja ende nuk ka siguruar votat për ta miratuar këtë çështje. Mbledhja do të fillojë sot rreth orës 16:00.
