Dilemat e presidentit të Serbisë, Tomislav Nikoliq, lidhur me qëndrimin e administratës së re të SHBA-së ndaj Kosovës, kanë marrë fund.
Sekretari Amerikan i Mbrojtjes, gjenerali James Mattis, Kosovën e ka quajtur një shembull të vendosmërisë së komunitetit ndërkombëtar, udhëhequr nga SHBA-ja, për mbrojtjen e interesave dhe vlerave të saj, raporton KTV.
I pyetur për mundësitë e reduktimit të numrit të ushtarëve amerikanë në Kosovë, Mattis ka thënë se një gjë e tillë nuk duhet bërë para se FSK-së t’i ndryshohet mandati.
I pyetur nëse BE-ja mund të ketë një rol më të rëndësishëm, Mattis është përgjigjur se ajo tashmë po e bënë këtë nëpërmjet dialogut, dhe se njohja e Kosovës nga Serbia, duhet diskutuar para anëtarësimit eventual.
Përgjigjet, Mattis i ka dhënë me shkrim më datën 12 janar, ditën kur ishte mbajtur seanca për konfirmimin e tij para Senatit amerikan.
Ish-gjenerali amerikan, James Mattis, që njihet me nofkën “Qeni i Tërbuar”, të premten u betua si sekretar i Mbrojtjes i Shteteve të Bashkuara të Amerikës.
SHBA-ja në Kosovë ka rreth 600 ushtarë si pjesë e KFOR-it, që në përgjithësi ka afër 6500 pjesëtarë nga 30 shtete.
