Presidenti Hashim Thaçi, sot ka dekoruar baroneshën Catherine Ashton me Medaljen Presidenciale të Meritave. Këtë dekoratë, Thaçi ia ka ndarë për kontributin e saj në dialogun për normalizimin e marrëdhënieve ndërmjet Kosovës dhe Serbisë, si dhe për përafrimin e Kosovës me BE-në, njofton Presidenca.
Presidenti Thaçi ka thënë se baronesha Ashton ka dhënë kontribut historik për arritjen e marrëveshjes së paqes, për normalizimin e marrëdhënieve Kosovë-Serbi, si dhe për afrimin e Kosovës edhe më tepër drejt familjes evropiane.
“E di që ka qenë punë e mundimshme, por pikërisht vendosmëria juaj, durimi juaj dhe vizioni juaj bëri që ne të arrijmë marrëveshje, të fillojmë komunikimet sa më normale mes dy vendeve që kanë qenë të armiqësuara dhe të fillojmë të ndërtojmë paqen dhe bashkëpunimin”, ka thënë presidenti Thaçi.
Kreu i shtetit është shprehur i bindur se vizioni evropian do të ngadhënjej në rajonin tonë, pavarësisht tensioneve të përkohshme që mund të krijohen dhe që mund të jenë edhe artificiale.
“E ardhmja e Kosovës dhe e tërë Ballkanit Perëndimor është një e ardhme euroatlantike që të jemi pjesë e NATO-s dhe Bashkimit Evropian, ku roli dhe kontributi juaj është madhor dhe historik”, ka thënë presidenti Thaçi.
Ndërsa, baronesha Catherine Ashton është shprehur e nderuar dhe e privilegjuar me ndarjen e Medaljes Presidenciale të Meritave për të.
“Ju falënderoj shumë për këtë vlerësim të një pjese të kontributit tim të vogël në një proces të jashtëzakonshëm. Kudo që shkoj nëpër botë, njerëzit më pyesin për këtë dialog. Shpreh mirënjohje për kurajon dhe përkushtimin që veçanërisht ju z. president e keni dëshmuar në synimin tuaj për t’ua mundësuar qytetarëve tuaj një jetë më të mirë”, ka thënë baronesha Ashton.
Ajo ka thënë se pret që edhe disa çështje të tjera të jetësohen.
“Janë këto çështje praktike që i bëjnë njerëzit të kuptojnë vlerën dhe fuqinë e të qenit të gatshëm për të biseduar së bashku. Uroj çdo të mirë për ju, palën tjetër dhe pasuesve të mi në Bruksel për të ardhmen e dialogut”, është shprehur baronesha Ashton.
Presidenti Thaçi dhe baronesha Ashton kanë ndarë mendime të përbashkëta edhe rreth rëndësisë së dialogut.
“Institucionet e Kosovës mbesin të përqendruara në bashkëpunimin afatgjatë me shtetet fqinje, në dialogun me njëri-tjetrin dhe në dobitë që do të krijohen për të gjitha shtetet e Ballkanit Perëndimor”, ka përfunduar presidenti Thaçi.
