Shefi i Grupit Parlamentar të Lidhjes Demokratike të Kosovës, Arben Gashi thotë se shumë deputetë të koalicionit kanë qenë të prekur me COVID-19, andaj sipas tij është vonuar Projektligji për Rimëkëmbje Ekonomike.
Gashi në “Debat Plus” ka komentuar edhe akuzat që Vjosa Osmani i ka bërë në adresë të Avdullah Hotit në intervistën e saj për Telegrafin.
Ai ka thënë se Vjosa Osmani dhe Avdullah Hoti i kanë tri probleme mes vete.
“Problemi i parë është problem personal. Kanë njëfarë mos durimi mes vete. Avdullahi nuk e shpreh këtë mosdurim ndërsa Vjosa e shpreh hapur. E dyta, kanë një mos komunikim publik pasi zonja Osmani mendon se ajo ka qenë e duhura për kryeministre pasi ka qenë bartëse e listës…E treta është mungesa e komunikimit kushtetues”, ka deklaruar Gashi në RTV Dukagjini, përcjell Telegrafi.
Gashi thotë se ai vet i ka kërkuar Osmanit pesë herë që ta votojë Projektligjin për Rimëkëmbje Ekonomike ndërsa sipas tij herën e gjashtë, Osmani i ka thënë që votën të vjen e ta kërkojë vet Hoti.
“Hoti meqë ishte në Kuvend i thashë unë me shaka: Kryeministër Vjosa po kërkon që ti duhet t’ia kërkosh nënshkrimin. Ai duke qeshur më tha: Po mor, që unë po e kërkoj nënshkrimin”.
Gashi thotë se Osmani nuk e nënshkroi dokumentin, por më pas e votoi Projektligjin në fjalë.
