Ish-kryetari i Komunës së Skenderajt, Sami Lushtaku dhe ish-ministri i Shëndetësisë, Uran Ismaili janë parë bashkë në një ndejë në Gollak.
Ndejën, ku shihen disa persona, e ka bërë të ditur vetë Lushtaku në një postim në Facebook.
Në bazë të pamjeve të publikuara nga ai, në këtë ndejë s’janë respektuar masat ndaj pandemisë COVID-19, e siç janë distanca dhe bartja e maskave.
“Sonte në Gollak, bashkë me një pjesë të bashkëluftëtarëve të kësaj ane. Është kënaqësi e madhe sa herë jemi së bashku, për të kujtuar të kaluarën e popullit tonë si dhe për të këmbyer idetë për të tashmen dhe të ardhmen e shtetit dhe shoqërisë sonë”, ka shkruar Lushtaku sipër fotografive të publikuara.
Duhet theksuar se Qeveria e Kosovës gjatë muajit korrik mori vendim që të ndalohen tubimet publike dhe ato private.
“Ndalohen të gjitha tubimet publike, duke i përfshirë ahengjet familjare private”, thuhet në vendimin e Qeverisë.
