Anëtarët e Komisionit për Shëndetësi dhe Mirëqenie Sociale sot do të takojnë drejtorin e Institutit Kombëtar të Shëndetësisë Publike të Kosovës, Naser Ramadani dhe drejtorin e Qendrës Klinike Universitare të Kosovës, Basri Sejdiu.
Komisioni pritet të njoftohet lidhur me gjendjen me pandeminë COVID-19 dhe gjendjen në sektorin e shëndetësisë në përgjithësi.
Mbledhja do të mbahet në orën 15:00.
Ndryshe, mbrëmë janë testuar gjithsej 200 mostra të marra nga Klinika Infektive dhe gjurmimi i kontakteve të rasteve në terren dhe janë konfirmuar tre raste me SARS-CoV-2.
Sipas IKSHPK-së, rastet pozitive janë raste kontakti nga komuna e Prishtinës tri raste. Ndërsa janë shëruar 18 pacientë derisa numri i përgjithshëm i të shëruarve deri më sot është gjithsej 754 raste.
Nga data 08 shkurt deri më 18 maj 2020, gjithsej 11.987 persona të dyshimtë në virusin SARS-CoV-2 dhe prej tyre pozitive rezultojnë gjithsej 988 raste, me gjithsej 29 raste të vdekjes të cilët kanë pasur sëmundje të tjera shoqëruese.
