Ministri i Shëndetësisë, Arben Vitia ka njoftuar përmes një postimi në Facebook se tashmë kanë arritur në Institutin Kombëtar të Shëndetësisë Publike, 7 mijë teste të porositura për COVID-19.
Vitia ka thënë se tashmë kanë inicuar kërkesën për porosi edhe të 10 mijë testeve të reja, ndërsa pranuan edhe një pjesë të materialeve mjekësore mbrojtëse nga OBSH-ja.
“Shtatë mijë teste mbërritën sot në Institutin Kombëtar të Shëndetit Publik për RT-PCR. Ato do të shërbejnë për të detektuar sëmundjen COVID-19. Ndërkohë, u iniciua kërkesa për furnizmin edhe me dhjetë mijë teste të tjera. Nga Organizata Botërore e Shëndetësisë (OBSH) mbërriti një pjesë e donacionit me material mjekësor mbrojtës kundër COVID-19. Në ditët në vijim mbërrin edhe donacioni nga UNICEF me materiale shtesë”, shkruan Vitia.
Gjithashtu ai bëri të ditur se individ e biznese si brenda edhe ajshtë vendit po vazhdojnë të solidarizohen duke dhënë donacione të shumta për të menaxhuar situatën e krijuar nga virusi.
“Përmes Bankës Botërore kanë përfunduar proceduarat e aktivitetit të prokurimit për material mjekësor mbrojtës. Ndërsa në Ministrinë e Shëndetësisë, është në fazën finale prokurimi për materiale mbrojtëse, pajisje dhe barna. Krahas veprimeve institucionale, individë dhe biznese brenda dhe jashtë vendit po vazhdojnë të solidarizohen me donacione të shumta si kontribut për të administruar situatën me COVID-19. Rreth 300 vullnetarë janë regjistruar dhe aktualisht janë në krye të detyrës duke i dalë në ndihmë qytetarëve dhe personelit shëndetësor”, shkruan ai.
Ndërsa, në fund bëri thirrje edhe njëherë për të gjithë qytetarët të respektojnë rekomandimet e institucioneve shëndetësore dhe të qëndrojnë në shtëpi.
“Kjo kohë krize edhe një herë e vuri në pah solidaritetin, gatishmërinë, vetëdijen dhe kulturën e lartë qytetare. E gjithë kjo është një falenderim, mirënjohje dhe ndihmë e madhe për personelin shëndetësor. Qëndroni në shtëpi. Ndiqni rekomandimet e MSh-së dhe IKShP-së.vBashkë do t’ia dalim”, ka shkruar Vitia. /Telegrafi/
