Shtabi Komunal i Kaçanikut për Parandalimin e pandemisë COVID 19, ka mbajtur takimin e radhës të udhëhequr nga kryetari i Komunës, Besim Ilazi dhe nga Kryesuesja e këtij shtabi Drejtoresha për Shëndetësi dhe Mirëqenie Sociale, Diana Reka.
Në këtë takim u bë e ditur edhe njëherë se deri më tani nuk ka asnjë rast me këtë virus në Komunën e Kaçanikut.
Shtabi komunal bëri thirrje që të mos bëhet panik në opinion, por njëkohësisht të ndiqen me kujdes udhëzimet dhe rekomandimet nga Ministria e Shëndetësisë dhe Instituti Kombëtarë i Shëndetit Publik.
Kryetari Ilazi falënderoi stafin mjekësor, i cili është mobilizuar dhe është duke punuar me përkushtim dhe vigjilencë.
Shtabi përbëhet nga përfaqësues të Komunës së Kaçanikut, nga Qendra Kryesore e Mjekësisë Familjare në Kaçanik, nga Policia e Kosovës, Kryqi i Kuq i Kosovës dhe nga Këshilli i Bashkësisë Islame në Kaçanik.
Nga ky takim i është bërë kërkesë Ministrisë së Shëndetësisë për material rezervë për stafin shëndetësor si dhe për ndihma momentale në rast nevoje.
Përveç ndalimit të veprimtarive biznesore të caktuara nga niveli qendror është ndërprerë edhe falja e namazit nëpër xhami, përveç thirrjes së ezanit.
Nga qytetarët kërkohet t’i shmangin lëvizjet e panevojshme, të marrin masat mbrojtëse si dhe të ruajnë qetësinë publike, kurse rastet e dyshuara të vetizolohen dhe të kërkojnë asistencë profesionale shëndetësore.
