Pas vendimit për ndërprerjen e mësimit deri me 27 mars, zëvendëskryeministri i Kosovës, Avdullah Hoti, ka paralajmëruar se në Universitetin e Prishtinës do të fillojë të mbahet mësimi virtual.
Këtë Hoti e ka bërë të ditur përmes një shkrimi në Facebook.
“Personeli i Universitetit të Prishtinës sot është njoftuar për përgatitjet që po bëhen për mbajtjen e mësimit virtual. E përgëzojë Rektoratin për këtë veprim shumë me vend në situatën e krijuar. Pres me padurim të jem në kontakt me studentët e mi për t’i kompensuar orët e humbura”, ka shkruar ai.
Qeveria e Kosovës mbrëmë ka mbajtur mbledhje të jashtëzakonshme ku ka marrë vendim për ndërprerje të procesit mësimor në të gjitha nivelet.
