Australia ditëve të fundit është përballur me zjarre të mëdha në natyrë, vërshime dhe breshër.
Pas kësaj, tashmë një tjetër rrezik është shfaqur për qytetarët e këtij vendi. Ekspertët kanë paralajmëruar që njerëzit të kujdesen nga merimangat vdekjeprurëse, shkruan CNN, transmeton Telegrafi.
Duke qenë autoktone në shumicën e rajoneve pyjore në pjesën lindore të Australisë, disa lloje të merimangës rrjetë-hinkë janë të njohura për helmin e tyre shumë të rrezikshëm, i cili arrin efekt në mënyrë të shpejtë.
Zyrtarët e parkut të zvarranikëve me bazë në Somersby thanë se aktiviteti i këtyre merimangave është rritur ditëve të fundit.
“Për shkak të reshjeve të fundit dhe tashmë ditëve të ngrohta që po i përjetojmë, merimangat rrjetë-hinkë do të fillojnë të lëvizin. Ky lloj i merimangave janë ndër llojet më të rrezikshme në botë sa i përket kontaktit me njerëz dhe ne duhet ta trajtojmë këtë çështje shumë seriozisht”, tha zëdhënësi i këtij parku, Daniel Rumsey.
Ndërkaq Warren Bailey, pronar i ABC Pest Control në Sidnei tha se helmi i këtyre merimangave është shumë i rrezikshëm dhe mund t’i vrasë njerëzit, duke paralajmëruar se tash për tash ekzistojnë kushte të përkryera klimatike për përhapjen e tyre. /Telegrafi/
